مذاكرة المواد العلمية

أهلًا💕 مبروك التخرج ياحلوين!

بما إنه الأغلب بيتكلم عن اللغة، حبيت أتكلم عن المواد العلمية بسمستر تو.

قبل ما أبدا فلسفة على راصكم بأقلكم درجاتي وشوفوا انتوا تكملوا قراءة ولا لا😂..

الكيمياء: الميد٥٠-٥٠, الفاينل خرجت بA

الأحياء: الميد٤٤-٤٥, الفاينل خرجت بA

الفيزياء: الميد٤٧- ٥٠, الفاينل خرجت ب+B

واضح اني مو أحسن وحدة تنصح،ب س ممكن كلامي يفيد لو وحدة💜 وإيوة، الحمد لله انقبلت طب رغمًا عن حفلة الفاينل.

1️⃣المذاكرة اليومية:

اتأكدوا إنكم"فاهمين" الأفكار وعارفين إيش بيصير يعني🙆🏻‍♀️. اكتبوا لنفسكم ملخصات، ملاحظات، ترجموا الكلمات الغريبة، خلوا كل شي جاهز, اسألوا لو متلخبطين في شي، لاتستحوا, أغلب الطالبات والدكاترة متعاونات جدًا! .. آخر شي تتمنوه وقت الميدتيرمز احساس إنكم عايشين في الضياع التام. ساعدوا نفسكم قبل! وكل واحد والطريقة الي تناسبه، خصوصي ولا سماع شرح للسلايدات ولا قراءة. بس لاتضغطواعلى روحكم وتعصروامخكم عالفاضي، بالذات الأشياء الحفظ سيبوهاخلاص لمذاكرة الميدتيرم، في النهاية حتتبخر وحتذاكروها من جديد فليش التعب ا لزايد، وترى جدًا عادي تتراكم عليكم كم محاضرة، مولازم حرفيًا" يوم بيومو" 😂 *مشروع تخريب*

بس لاحقيقي، نفسيتكم ثمينة، وطاقتكم ليها حد معين لاتخلص وتطفشوا، صدقوني! وازنوها🙏🏻

2️⃣مذاكرةالميدتيرم:

فهم من قلب، وحفظ عالخفيف.

- لاتسحبواعلى نقاط بكيفكم😂، حاولوا تفهموا كل فتفوتة، ولو شي استعصى خلاص أهم شي الضمير انكم حاولتوا وماقصرتوا* الحياة سهالات* 😂 و لا تعتمدوا مذاكرة للكتشر اي كلام على اساس انكم حترجعوا تراجعوا كل سلايدز، غالبًا ما بيكون فيه وقت، اعطوا كل لكتشر حقه مرة وحدة و توكلوا.

- المذاكرة والتركيز عالسلايدات، لاتضيعوا جهدكم عالكتب، الا لو نقطة حسيتوا انكم حُستوا فالكتب توضحلكم بتعمق أكثر، يعني لنفسكم بس.

- المسائل و اي تطبيق لاتمروا عليهم بعيونكم و اوه سهل! لاحلّوا بيدكم. اتاكدوا انكم متدربين.

- الحلو انه الاختبارات اختيارات، ففيه طرق حل يعقّدوها بالسلايدز تغاضوا عنها و عادي لاقوا طرق تناسبكم مدام تؤدي للأجوبة نفسها.

- اليوتيوب كنز فعلًا بالذات للأحياء! مذاكرتي ليه كانت عبارة عن يوتيوب لين استوعب وبعدين عالسلايدات، و الأفضل تكون بالانجلش عشان تتعودوا عالمصطلحات.

-قنوات التلقيرام فيها أشياء مفيدة.

- التجميعات افتحوها في النهاية لوعندكم وقت، تساعد مرة , بس فيها أغلاط، فيبغالكم تحلوا وانتوا مصحصحين. ولو شكيتوابشي؟ ارجعوا اتاكدوا من السلايدز، او ارسلوا بالقروبات، أحيانًا مثلا شي تحسبوه غلط بس يطلع فهمكم هوا الي غلط

- ذاكرتكم ممكن تخونكم، فاعتمدو االربط الذهني للمعلومات الي تنحفظ.

- ذاكروا مزبوط عشان في الفاينل خلاص تمروا على جزئية الميد مرور الكرام، لعبتكم تصير.

3️⃣مذاكرة الفاينل:

بالنسبالي التحضيري كللله كوم و فترة فاينل سمستر تو كوم ثاني، مستواه أعلى بكثير بالمقارنة -على بلاطة- ! و شايفين من الدرجات كيف الحمد لله معمعة الفاينل فقدت فيها السيطرة شخصيًا و درجاتي اتفجرت 💔😂 فما عندي شي مفيد أقوله هنا صراحة تجربتي مش ولا بد، التخبيص كان في الجزئية الي ماقيد اختبرنا فيها.. فيمكن كان المفروض اضغط على نفسي و ألملم اللكتشرز الي مو داخلة بالميد *بضمير* من قبل 🤔 نصيحتي: وصلتوا لآخر المشوار فجمّلوها.. قلبكم لازم يكون قوي دي الفترة 💜

4️⃣المحاضرات:

الدكاترة ينبهوا على أشياء مهمة ويقولوا كذا معلومات زيادة، وكيف ممكن تجي طريقة الأسئلة, واحيانا يحذفوا كم نقطة😉 و عقلكم الباطن يشتغل ويحلل المعلومات ، فاحرصوا عالحضور 🙏🏻💛

واحس غريب اقلكم بس منجد لو محاضرة حاسين الاستفادة منها حرفيًا صصفففر، اقعدوا ورا و استفيدوا من الوقت فاي شي ثاني* مدري تعتبر نصيحة ولا ايش* 🙃😂 و لو ما عجبكم شرح أحد دوروا عالتسجيلات لثانين* لوسامحين بالتسجيل* . و عمومًا، الجامعة تعتمد عالتعليم الذاتي أكثر شي، انتم المسؤولين تماما فلا تلوموا غيركم، مافي أعذار!

5️⃣ للزيادة! 🌸

- ارجع أقول.. نفسيتكم ثمينة، تستحق تعطوها راحة، وماتزيدوا عليها بالتوتر والتقطيع. وترى جدًا عادي، يمديكم تخرجوا و تغيروا جو! مو شطار يعني روبوتات تذاكر، أولويات بس.

- المنهج و الأفكار سهلة لو فكرتوا فيهم خارج جو الضغط، أصلًا مو ضغط انهياري مرة مقدور عليه، محد خارق تعدّوا زي ما غيركم عدّا، يحتاج طولة بال و صملة . و بالنسبالي المواد العلمية أحسن عشرمية مرة من مفاجآت الانجلش 😂

- المبادئ فوق كل شي. الغش لاتخلوه خيار💔

- كلاسي مسنترين تحفيز وشرح لبعض و الأغلب دخل رغبته الأولى ما شاء الله! "محد حياخذ نصيب أحد" .

- ستكون ممتنًا فخورًا بنفسك لاحقًا لكل لحظة كدت أن تنطفئ فيها و لم تفعل - جملة حمستني طول المشوار 💕

- استعينوا بالله و لا تعجزوا💜 طلعت درجة حلوة؟الحمدلله. الدرجة صدمة نفسية؟ برضو الحمدلله، عادي, ننهار ونتحلطم شوية ونرجع نكافح ما كأنوا شي😂، شديتوا حيلكم.. ومين الي يعرف الخير؟ احنا؟ لا, اللطيف الخبير💕

•••

رأيي و تجربتي, وأكيد فيه من يخالفني.

لو أفدتكم لو شوية ادعولي. قلبي معاكم، ربنا يوفقكم..