تجربة من الطالبة شهد -مرفق في نهاية التجربة نصائح ومواقع جيدة لتطوير مستوى الإنجليزي-

اهلين،

انا شهد بما اني انهيت السنة التحضيرية بالحرس بمعدل كويس ( مواد الانقلش سمستر ون كلهم A+ وسمستر تو مادتين منهم A والاخيرة A+) اقدر اتكلم عن تجربتي مع الانقلش (تناسب المبتدئين اكثر شيء) بداية الصيفية قبل مايطلع قبولي بالحرس ماكنت اعرف اكتب جملة😂 حرفياً كنت ميح مع انه ايام الابتدائي كانت انقليزيتي كويسه بس معد مارست الانقلش وكل شيء راح.

بالبداية قرأت تجارب الناس وكيف تعلموا الانقلش وايش اللي فادهم حاولت اجمع اكبر قدر من التجارب واشوف ايش اجمعوا عليه اغلب الناس كان وقتها ايام الاختبارات النهائيه وكنت متحمسه اني استغل ال٤ شهور بتطوير الانقلش ، بنهاية عرفت ٣ اشياء مهمة.

١- اذا زاد الشغل على المدخلات كانت المخرجات جداً عجيبة

٢- لاتستعجل على النتائج

٣- القرامر(القواعد) مو مهمة للمبتدئين، مهارة الاستماع اهم شيء.

اوك نتكلم عن المدخلات والمخرجات اول شيء:

المدخلات: هي اللي يسعى لها الشخص ببداية تعلمه لأي لغة مثل ( الاستماع والقراءة)

المخرجات: هي النواتج المدخلات وغالبا ً يتم تطويرها بعد مايتم تطوير المدخلات مثل ( التحدث و الكتابة). اذا استمع الشخص كثير للمقاطع والافلام والمسلسلات او الراديو = راح يقدر يتحدث بطلاقة اذا قرأ الشخص كتب ( نفس مستواه) راح يقدر يكتب بسلاسة .

* راح اتكلم شلون طورت الاستماع عندي بالبداية.. حضرت دورة زمان وكانت تقول الشخص اللي يبي يطور الاستماع عنده لازم يستمع شيء مناسب لمستواه مثلاً انتي ميح مره بالانقلش؟ روحي شوفي اطفال الاجانب اللي توهم يتكلمون وش يناظرون مثلاً " دورا "والخ طبعاً بدون ترجمممه هذا اهم شيء اكتبي باليوتيوب : cartoons for 2 years old ما استهبل بديت انا من كراتين طفل عمره ٤سنوات كنت اطططفش وانا اناظرهم بس شسوي عاد ابي اطور الاستماع من الصفر..

تقدرون تشوفون برنامج بارني والاطفال هو الوحيد اللي تقبلت اناظره بإبتسامه😂 اللي يقولك شوف مسلسلات مثل friends لغتهم بسيطه صحيح لغتهم بسيطه وواضحه بس مو لشخص مبتدأ راح يشيل الترجمه منهم ، بالبداية كنت اشوف كراتين لمدة ٢-٣ ساعات ثم اروح اشوف مسلسل لغته بسيطه مع ترجمة واحاول اركز عالكلام كثيير طبعا ً مررره لغتهم واضحة وسهلة.

مثل: Mind your language -١

Friends -٢

How I met your mother -٣

وفيه بعد قناة BBC English عاليوتيوب حلوه مره بس بالبداية كنت احط معها الترجمة طبعاً بالنسبة للكراتين اللي بدون ترجمة لازم تكونين فاهمه ٨٠٪؜ من اللي ينقال و ٢٠٪؜ زيادة اذا

حسيتي صرتي تفهمين ١٠٠٪؜ او ٩٠٪؜ منه غيري مستوى صعوبة الكرتون لواحد اصعب شوي وهكذا.. بالنسبة للاستماع تطورت بسرعه فيه واكثر مهارة لاحظت تطوري فيها، طبعاً مايمانع افلام ومقاطع وفلوقات مستوى صعوبتها عالي شوي اهم شيء تركزين عالكلام ووتزيدين من المقاطع اللي مستواها قد مستواك بدون ترجمه.

الحين بتكلم عن القراءة:

بالبداية ماقدرت اقرأ اي كتاب طبعاً ! لان احتاج ازيد عدد الكلمات عندي قبل اقرأ.. بديت احفظ كل يوم ١٣ كلمة تقريباً كتابة ونطقاً طبعاً اسوء طريقة هي انك تحفظينهم بدون ماتحطينهم بجمل لان بتكون اصعب + مابتعرفين شلون تستخدم لان ساعات ماتنحط الكلمة بأي صياغة.

فمثلاً تترجمين الكلمة وتحطينها بجملة تسمعين نطقها من موقع موثوق انصح بكتب essential words in English 4000 تلقون كل المستويات ٦ موجوده pdf بالنت ومره حلو يعطيك تعريف الكلمة بالانقلش وعليها مثال ثم عليهم تدريبات ويحطهم بقصه ويعطيك اسئلة عالقصة واذا تبين تتأكدين من حلك اكتبي اسم الكتاب وجنبه AK pdf بتلقين الحلول لما تختارين الكتاب شوفي الفهرس وبيحط كل الكلمات اللي بتدرسينها اختاري كتاب مناسب لمستواك، بالبداية مايمانع تترجمين الكلمات لان شيء طبيعي بس اذا استمر الترجمة وانتي بمستوى عالي راح يكون له سلبيات مثلاً تفكرين بالكلام قبل تقولينه لانك جالسه تحولينه من عربي لانقلش بعقلك.

قد ماتزيدين الكلمات قد ماتلاحظين الفرق بأنقليزيتك بعد شهر او شهرين على حسب اجتهادك وتطورك تقدرين تقرين كتب طبعاً انصح بكتب ( اكسفورد ) هالكتب لها مستويات كثير من starter ثم ١،٢،٣..الخ موجودين بجرير الواحد ب ٣٦ ريال تقريباً وهذي القناه تنزلهم pdf بس مو كل القصص لكن تنزل كل المستويات بعدد معين

https://t.me/OxfordBookworms

لما ابتديت حسيت ليفل ١ يناسبني لان شفت ليفل starter مره مبتدئ طبعا ً ماتنتقلين من مستوى لآخر الا عالاقل قريتي ٧-٨ كتب من المستوى السابق.. ايش فايدة هالكتب؟؟ كل مستوى لها قرامر معين مثلاً مابيخليك تنتقلين من مستوى ١ الى ٢ الا وانتي عارقة قاعدة الماضي البسيط وبنهاية كل كتاب موجود المفردات الجديدة اللي تعلمتيها وغالباً تكون هالمفردات صدق اللي وقفتي عندها وماعرفتي معناها. من المستوى ٥ او ٦ اظن يمديك تقرئين اي كتاب بالانقلش. وبكذا يكون خلصنا المدخلات.. راح اتكلم عن المخرجات اللحين: بالنسبه لسبيكنق(التحدث): بعد شهرين اظن من حفظ الكلمات والاستماع صرت اقدر اشبك كم جملة وافهم الشخص اللي قدامي اشتركت (بكامبلي) تطبيق يسمح لك بالتواصل مع معلمين لغتهم الام الانقليزية فادني مررررره مره خصوصاً انهم يراعون انك مبتدئة بالانقلش وبعد اذا مافهمتي شيء يقدرون يكتبونه لك ويتّرجم لأنقلش . عموماً تجربة مفيدة للمبتدئين بس للناس المتقدمة تقدر تشوف برنامج (Wakie) حالياً استعمله انا ، تقدرين تتواصلين مع اي شخص من الخارج مكالمات وورسائل او نقاش عن موضوع مع عدة اشخاص طبعاً ناس مو متخصصين بالانقلش ناس نفسك يبون يمارسون اللغة او بس يسولفون ميزة هالبرنامج تقدرين تسوين حظر لكل المدن العربية عشان اللي يطلع لك بالتايم لاين يكونون اجانب..

فيه طريقة اخرى تطورين فيه مهارة التحدث وهي تفتحين الكاميرا وتسولفين مع نفسك😂 اكثر طريقة احبها مره لان احب اسولف انا على راحتي بدون مااحد يحكم على لغتي او اغلاطي واذا طفشت مافيه موضوع اتكلم فيه اكتب بالنت Questions to ask واسأل نفسي واجاوب. طبعاً مهارة السبيكنق تجي بعد ماتطورين الاستماع وتزيدين محصول الكلمات عندك.

آخر مهارة هي الكتابة: اقدر اقول انه هذي المهارة تجي في اخر الاولويات لعدة اسباب:

اولاً المهارة هذي تتطور بعد تطوير القراءة

ثانياً الكتابة اقل اهمية في تعلم الانقليزية يعني مثلاً اذا ماتعرفين تكتبين انقلش مو معناته ماتعرفين تتكلمين انقلش او تفهمين الشخص اللي قدامك.

بخصوص تطوير هالمهارة لازم يكون عندك محصول كافي من الكلمات ثاني شيء لازم تتعلمين القواعد الاساسية في الانقلش مثلاً جميع الازمان + حروف الجر والخ. ثالث شيء لازم تكتبين كثييير مثلاً تتواصلين مع اشخاص كتابةً تقدرين تسوين لك حساب بالتويتر كله انقلش تردين ع مقاطع الاجانب وتغريداتهم او تدخلين برنامج (Hellotalk ) وتسولفين مع ناس لغتهم الام الانقليزية او حابين يمارسون الانقلش مثلك. فيه بعد طريقة لتطويرها واللي هي نهاية كل يوم تكتبين وش صار لك اليوم وايش بتسوين بكره والخ. او حتى مثلاً تقرين اي مجله او كتاب ثم تلخصينه.

حابه اقول كم نصيحة بخصوص الاشياء اللي بتفيدك بالحرس

: ١- موقع readtheory تدربين فيه على قراءة القطع ثم يعطيك اسئلة تجاوبين عليها واذا غلطتي يشرح لك ليه الاجابه a مثلاً تعتبر هي الصحيحة + فيه مستويات ويسوي لك اختبار تحديد مستوى قبل مايعطيك مستوى معين واذا نجحتي في عدة قطع لمستوى معين ينقلك لمستوى اعلى.

٢- موقع ESL للاستماع مررره حلو يعطيك تسجيل صوتي تسمعينه وتجاوبين على عدة اسئلة فيه مستويات ومره بطل اذكر اني ختمته كله بصيفيه، وتفاجأت انه اغلب اختباراتنا الاستماع كانت منه ببداية السمستر، ايضاً موقع British Council learn English فيه استماع بالاكسنت البريطاني طبعاً كنت انزل بالدرجات اذا كان التسجيل الصوتي بالاختبار اكسنت بريطاني🤷🤷♀ حلو تدربون على اكثر من اكسنت.

بحط لكم كم قناة باليوتيوب وكم تطبيق او موقع فادوني بعدة اشياء:

١- تطبيقEnglishcentral يعطيك مقاطع متنوعة بمختلف المجالات وتسمعين المقطع والكلام مكتوب اسفل المقطع واذا ماعرفتي كلمه تحددينها يترجمها لك بأي لغه مثلاً العربيه او تبين انقلش تعريف لها او مثلاً امثله عليها وتقدرين تحطين الكلمه ضمن اللسته اللي فيها كلمات جديدة عليك وكل يوم تراجعينهم ويحط عليها براكتسز مثلاً تدريب املاء عالكلمة او نطق والخ.

٢- ZAmerican English هذي قناه باليوتيوب لمعلم مصري طبعاً اللي جذبني لها هو الاكسنت تبع

المعلم😍💙 اكسنت امريكي مضبووط ومسوي كورسات مجاناً وفيه مقطع يشرح كيفية اتباع كورساته طبعاً كورسات كاملة من إلى وعنده تطبيق وكل شيء موضحه بقناته مرره بطل خصوصاً بالقواعد يبسطها لك جداً ، مفيد لكل شخص ضايع مو عارف من وين يبتدي..

٣- موقع youglish تحطين اي كلمه تبينها وتحددين وش الاكسنت اللي تبينه ويطلع لك كل شخص نطق هالكلمة باليوتيوب عشان تعرفين النطق الصحيح لها واستعمالاتها.

وبكذا قلت كل اللي عندي موفقين يارب والله يكتب لكم كل اللي فيه الخير وتذكروا دائما: الإنسان يحصد مايزرعه ❤️❤️