تجربة من الطالبة جود

 

اهلاً، انا جود وبحكي لكم عن تجربتي وخصوصاً في الانجليزي لاني اعتبره جزء مهم في الجامعة لان الترم الاول عليه ١٤ ساعة اكاديمية (من اصل ١٨) وفي الترم الثاني عليه ٦ ساعات (من اصل ١٨) لذلك يعتبر الانجليزي اول نقطة اغلب الطلاب يستفسرون عنها. اول شي انا قبل ما ادخل الجامعة كلمت وحدة من طالباتها استفسر عن الجامعة ونظامها وقالت لي "سهالااات الوضع اصلاً انا ادخل واخرج من الكلاسات ما استفيد شي واجيب درجات كاملة، انت بالراحة يمديك تجيبين ٥" وأبد سمعت كلامها بحكم اني اعتقد ان لغتي جيدة 😂 لكن ما ابيكم تفكرون الوضع كذا لاني اكتشفت انه يتطلب مجهود وان كانت لغتك جيدة.

نجي للسمستر الاول مادة (101 english) جزئية الاورال سكلز ما تعبت فيها حمدلله لاني من زمان اشوف مسلسلات وافلام ويوتيوب (ولكن لاحظت ان اليوتيوب اكثر شي فادني من ناحية الاستماع) وبالنسبة للسبيكنق كنت احاول اشارك مع المس لما تطرح سؤال او اناقشها في فكرة معينة لان مرات نكون نعرف الكلمات لكن ما تدربنا على اننا نستحضر هذه الكلمات بسرعة ومع مرور الوقت حسيت فعلااا تطورت عندي هذه المهارة. نجي لجزئية الرايتنق وهذه المادة تعتمد بشكل كبير على المس وطريقة تصحيحها، يعني حاولي تفهمينها ايش الاشياء اللي تعجبها وتبهرها، فعلى سبيل المثال اللي درستني كانت تعشق الافكار الغريبة الغير مألوفة وانا فهمت هذا الشي من اول اسايمنت وحمدلله في كل الاسايمنت كنت اخذ درجة مرتفعة، بعض البنات فهموا طريقتها متأخر وجابوا درجات مرتفعة ولكن في الاسايمنت ال٤ وال٥، فهذه اعتبرها نقطة مهمة لازم تركزون عليها. ايضاً في كويزات الرايتنق اول واحد جبت فيه درجة منخفضة ولا كنت فاهمة اصلا طريقة الاسئلة واللي حولي كلهم كانوا فاهمين طريقة الاختبار ويتكلمون عن وحدة اسمها افنان ال زايد وانا ما كنت اعرفها! ليش الكل يعرف هذه البنت وكيف ساعدتهم على طريقة الكويز، فطلعت هذه البنت من الدفعات السابقة وكانت تنزل اشياء مفيدة من ضمنها كويزاتها وقد ا ّطلعوا عليها البنات، فلا ترتكبون خطئي هذا وحاولي تستفيدون من كل المصادر المتاحة لكم وكل المساعدات من الدفعات السابقة.

(102 English) اقدر اختصر لكم هذه المادة بأنها (التعب اللي تبذلينه راح تلقينه) كنت انبسط اني ابذل مجهود واتدرب والقى نتيجة علطول. طبعاً درستني وحدة رائعة بمعنى الكلمة فكنت اسوي ملخصات على الملاحظات والطرق اللي كانت تعطينا اياها، لكن بعد فترة سمعت البنات يتكلمون عن شي اسمه (بيتر نوتس) وانا مادري ليش كلهم يدرون ايش هو وانا لا، طلع هذا مدرس اسمه بيتر يدرس في الحرس يسوي ملخصات وشروحات لمادة القرامر (برضو لا تكررون خطئي حاولوا من البداية تستفيدون من كل المصادر)، فصرت استفيد من ملخصاتي وبعدها ا ّطلع على بيتر نوتس عشان اشوف لو فيه معلومة ما انتبهت لها او ما ركزت عليها، بعدين نجي لاهم نقطة الا وهي التدريب! بعد المذاكرة كلها لاازم تتدربون سوا ًء على الوورك شيتس من البلاك بورد او تاخذون تدريبات الوورك بوك وترجعون تحلونها اهم شي تدريبات مع حلول عشان تتاكدون من فهمكم.  (103 English) هذه المادة الصراحة اعتبرها ان نصها يعتمد على جهدك والنص الثاني يعتمد على خلفيتك في الانجليزي، عندك نص الاسئلة راح تكون على الفوكاب ليست عن الكلمات وعن مفرداتها واكثر شي كان يساعدني في تذكر المفردات هو موقع كويز ليت (هالمرة استفدت منه قبل ما اشوف اللي حواليني يتكلمون عنه وانا مادري ايش السالفة 😂) كان مفيد جداً خصوصا ان بعض الكلمات مفرداتها غريبة فكان هذا بمثابة الاختبار لي، وكان فيه جزء ثاني يعتمد برضو على مجهودك اللي هو الافكسز (حروف لو اضفتيه للكلمة يتغير معناها) كانت طريقة سمستر ون متعبة شوي (حمدلله تغيرت الطريقة في سمستر تو) كانت كل كلمة جنبها اكثر من افكسز ولازم اعرف ايش اللي اضيفه وافرق بينهم، طبعا كانت المس تخصص وقت في بداية كل تشابتر تساعدنا من هالناحية. نجي للجزء اللي يتعمد على خلفيتك بالانجليزي، الصراحة هذه الجزئية صرت احاول افهم هم لما يحطون السؤال بنا ًء على ايش يختارون ان هذه الاجابة الصحيحة. فمثلاً، في الكريتيكال ثنكنق اعطانا جملة (جنيفر انيستون مشهورة) ويقول ايش اللي تفهمه من هذه الجملة، وكان عندنا ٤ خيارات. اثنين منهم كانت مختلفة مرة، لكن واحد من الخيارات كتب (هي ممثلة في افلام ومسلسلات معروفة)، والثاني(هي معروفة من قبل الصغار والكبار). طبعا الاجابتين متقاربة، لكن الاجابة الصح كانت انها (هي معروفة من قبل الصغار والكبار). بالرغم من اننا كلنا نعرف ان جينيفر انيستون ممثلة لكن من الجملة اللي اعطاك اياها ما ذكر اي شي عن كونها ممثلة، ذكر فقط انها معروفة، فلازم تحاولون تكتفون بالمعلومات اللي عندكم. وبعد في القطع يعطينا كلمات ويطلب معناها، فاللي لغتهم كويسة ممكن يعرفون الكلمة من غير ما يحتارون بالخيارات (في الغالب تكون الكلمات صعبة وعشان تعرفونها لازم تكونون فاهمين الجملة زييين) فهذه النقطة مررة راح تساعدكم.

نجي السمستر الثاني تقريباً نفس النصايح طبقتها. عندنا الرايتنق صار مادة لحال هالمرة، وسويت حركة اني اكتب افكار غريبة وغير مألوفة طبعا انصدمت المس ولا عجبها وانا تداركت الموضوع اكتشفت انها تحب الافكار البسيطة والسلسة ففي أول اسايمنتين جبت درجة حلوة لاني سويت هالحركة، لكن لما جا الاسايمنت الاخير سويت اللي عجبني ولكن نقصت لاني ما طبقت الاشياء اللي تعجبها (فلا تكررون خطئي). بالنسبة للقرامر نفس النصايح لكن مو دايما يمديني اسوي ملخص فكان هذا السمستر اعتماد كبير على بيتر نوتس، وعلى التدريبات. واما الريدنق تغيرت فكرة الافكسز وصارت مثل الكتيّب فصار اسهل لاني اعرف ان هذه الكلمة الافكس الوحيد اللي يجي معها هو كذا، والفوكاب ليست مع المرادفات طبقت نفس فكرة الكويز ليت. للكريتكال ثنكنق كان مستواه معقول وقد يكون اسهل من سمستر ون لان الجمل صارت اطول واوضح اما الباسج فهذا السمستر مستواه كان اصعب وبعض الاسئلة حسيتها غير منطقية. لكن حاولوا تسألون المس وتستفسرون عن طرق تساعدكم لان بعض الاحيان يكونون قد اطلّعوا على الاسئلة فممكن يعطونكم فكرة. وبس كون لغتي جيدة في الانجليزي فهذا اعطاني فرصة اني اركز على المواد العلمية اكثر (بحكم ان وقت مذاكرة الانقلش كان اقل) وقدرت اجيب في مواد الانقلش كلها +A لكن كان يبيله مجهود كبير واستفادة من

المصادر الموجودة، والله يوفق الجميع ❤️